अनेक शिबिरं श्रीअरविंद सोसायटी व दिल्ली आश्रमातर्फे दरवर्षी घेण्यात येतात. युवकांच्या शारीरिक आणि आत्मिक विकासास योग्य दिशा आणि गती मिळेल अशी या शिबिरांची आखणी केलेली असते.

नैनितालमध्ये आठ दिवस तिथल्या पहाडी परिसरात ट्रेकिंग, रॉक क्लाइंबिंग, रॅपलिंग, रिव्हर क्रॉसिंग असे साहसी प्रकार अनुभवले जाऊ शकतात. सर्व भारतीय भाषांमध्ये गीतगायन केलं जातं. पाँडिचेरी शिबिरात योगाभ्यास, ध्यान याचा अनुभव, स्वतःची ओळख, जीवनातील ध्येय या विषयांवर तज्ज्ञ आणि अनुभवी लोकांची व्याख्यानं आयोजित केली जातात. पाँडिचेरी आश्रमातील आध्यात्मिक आणि पुरोगामी तसंच शांत, स्वच्छ आणि शिस्तबद्ध वातावरणाचाही अनुभव युवक घेतात. श्रीमाताजींनी वसविलेल्या ‘ऑरोव्हिले’  या जागतिक शहराची उद्दिष्ट आणि रचनाही समजावून दिली जाते. त्या शहराचे नियम असे आहेत की, तिथं व्यक्ती आपल्यातील सुप्त क्षमतांचा संपूर्ण विकास करून श्रीअरविंदांनी ठरवलेलं आध्यात्मिक उद्दिष्ट गाठू शकेल.

या दोन्ही शिबिरांमध्ये भारतातील विविध राज्यांतील युवक सहभागी होतात. श्रीअरविंद केंद्रात जीवन आणि जाणिवा संपन्न करणारे अनुभव मिळतात.